Kunnskapsdepartementet sender med dette forslag til endringar i universitets- og høgskuleforskrifta på høyring. Den nye universitets- og høgskuleforskrifta tok til å gjelde 1. august 2024, samtidig med den nye universitets- og høgskulelova. Dette var første del av arbeidet med ny og betre struktur på forskriftene til universitets- og høgskulelova. Departementet følgjer opp dette ved no å foreslå ei samling av fem forskrifter i universitets- og høgskuleforskrifta kapittel 1 og 2. Forslaget vil gi ei forenkling og ei samling av regelverket ved at desse fem forskrifter blir oppheva: studiekvalitetsforskrifta, studietilsynsforskrifta, gradsforskrifta, mastergradsforskrifta og godkjenningsforskrifta.